حقوق المرأة المستخبية

يا أهلا ومرحبا في بلاد تحت القاع ..
ااااا مممم
نقطة ومن أول السطر . . . . .
الحقيقي انا جاية اتكلم في حاجة وجه في بالي حاجات كتير فا لو صادفت أثناء قراءتك فقرة مالهاش علاقة بالموضوع تجاهلها فورا او توقف عندها واستفد او متستفيدش مش مهم ، الكلام ده كله نتاج صراعات فكرية لشخص حر يحطها في مدونته الشخصية.

 

Powerful women

When a woman gets to a good position, she won't lose it easily because of drama 

النظرة اللي دايما بتشوفها علي وش اي حد جاهل لما يسمع عن واحدة قوية ومعقدة بنفسها، 

هدخل في الموضوع على طول

قدامنا حالتين: واحدة بتشتغل في شركة ,حلوة وجميلة وقوية كفاية انها تعرف تتسرسب وتترقى كذا مرة وكل مايقابلها واحد وتعجب بيه بتدلق على وشها وتنسى كل الكلام اللي كانت بتقوله لنفسها عن الكفاح والقوة والكلام ده وتبدا تفني حياتها في سبيل اسعاد فتى الأحلام المنتظر .. ده مش تقليل منها في حاجة ده بس دليل على انها متعبتش عشان توصل للي هي فيه دلوقتي وتسلقت السلالم السهلة وخلاص ،في الناحية التانية هتشوف واحدة تعبت جدا في مجالها ومفيش حاجة خدتها بالساهل وكانت بتنفصل كتير عن حياتها الشخصية بس لمجرد انها توصل للمكانة اللي هي فيها دلوقتي .. تفتكر انها تقدر تتنازل عن كل ده من أجل كلمة لطيفة هي ممكن تكون فعلا محتاجاها؟ معتقدش

هتقف صامدة في مكانها ومتسيبش نفسها للريح تودي وتجيب فيها لحد ماتلاقي حد في طريقها ميكونش بيعترض طريقها ولا يعطلها .. مش لازم يدعمها من كل قلبه بس ميكونش عبء ويخليها في يوم من الأيام تفكر تقامر بمجهودها عشانه

البنت القوية مش شعار بنرفعه لما نحس انهم اتكاتروا علينا .. البنت القوية زيها زي الولد القوي اللي بيكافح وبيتعب عشان يوصل للهدف اللي هو عاوزه، 

عاوزة أفاجئك عزيزي المتابع اني مش من مناصري الجماعات العنصرية اللي بتدعم حقوق المرأة عشان بكل بساطة المرأة مش كائن مستضعف محتاج حد يناصره ولا كائن عديم الرأي عشان يحتاج حد يدعمه .. النساء قويات حسب ماتحمله الظروف ضدهن ،وهتشوف أمثلة كتير جدا حواليك ومن ضمنها بيوت الراجل بيقعد فيها زي الترابيزة بيسيب مراته تقوم بكل المهام الحياتيه ..أو الست اللي تقدر تقلب راجل على أهله، أو أو أو ..

تقدر تقولي ان مثال من الأمثلة دي ست ضعيفة؟ القوة مش بس الكارير والحاجات اللي السوشيال ميديا ملى بيها عقولكم. القوة زي ماقلتلك بتتغير على حسب الظروف اللي بنواجهها

الستات داهية وأنا منهن وفعلا ممكن يسببوا خراب والحياة مش محتملة ضغوطات عشان تحطونا في حرب مين الأحسن الراجل ولا الست، المعادلة معقدة اكتر من كدة ولو الناس بتوع السوشيال ميديا كان عنده حاجة مفيدة يقولها مكانش بقى مشهور (تحياتي ليهم جميعا هه) .. والسترونج اندبندت دي موضة زيها زي البنطلون الشارلستون واسأل أي استرونج اندبندنت كدة شوفها هتقولك ايه

البني آدم القوي عمتا هو الشخص اللي يقدر يحمي نفسه من ضغوطات الحياة ويقدر رغم أي حاجة حواليه يكمل حياته ويعمل اللي كان نفسه فيه سواء كان خير أو شر بس عموما مقدرة البني آدم على الإقناع تعتبر قوة ومقدرة بني آدم انه يأذي حد بالكلام فقط ومن غير مايحرك صباع دي قوة خارقة ومقدرة بني آدم انه يستغل صف المستضعفين ويتكلم باسمهم دي قوة بغض النظر عن حكمك عليها اذا كانت خيرة او شريرة .. المهم ان ده يثبت نظريتي ان النساء داهية ومش مستضعفين ولا حاجة وسامعاك ياللي بتقول داحنا اللي مستضعفين ..هه ابدا والله دانتو المصائب اللي النساء بتترأسها 

فا عاوزة اقول ان المعادلة معمولة بالملي كلنا متوازنين في القوة ومحدش أقوى من حد .. كل واحد عنده قوته اللي بتميزه ..وبالمرة عاوزة أوضح حاجة كنت قريتها في كتاب ديني للاسف استفزتني جدا ألا وهي ان ربنا ميز الرجال عن النساء وانه بيحب الرجال اكتر من النساء عشان هم أقوى .. لا مش هشتم بس أصحح المعلومة .. ربنا لو بيحب الرجال اكتر ليه بيخليهم يعملوا الطاعات زيهم زي النساء؟ ولو الموضوع فيه تمييز يبقى ربنا بيحب الملايكة اكتر من البشر عشان الملايكة مبتعملش ذنوب ...بطلوا هري بقي الله يخليكم وخلونا نعيش الحياة دي بسلام من غير عقد وكلاكيع وأكررها تاني ان دي معادلة ليها مقادير ومش هقدر افتي وابت فيها مش عشان انا بس معرفش لا عشان محدش في الدنيا يعرف مقادير المعادلة واللي مفكر نفسه فاهم وعارف يبقى عاش ومات غباوته 

وربنا مش بيحب الرجالة اكتر يا وهابيين يا متخلفين .. وإلا..