خشلي يابني بال infinite loop

كتاباتي غير متأثرة بموقف او بشخص معينين ولكني افرض نظرية عامة من خلال دراسة شخصيات محددة وايجاد النقاط المشتركة ولا أهدف بذلك تغيير الرأي العام ضد اي فئة لا سمح الله .. وسوف يتم مقاضاة كل من يحاول الاعتراض على رأي الكاتب 👿
الجملة المستحدثة هذه الايام واللي بتتكرر بداعي او بدون داعي او ضمن سياق الهزار هي: "كلنا مرضى نفسيون" ، عارفين بقى سبب اننا مرضى نفسيون ايه؟
التربية ياسادة..
ايون بالظبط "الأهل" هم سبب كل العاهات اللي بنقابلهم في حياتنا والضغط اللي بيسببوه وطبعا لأن الموضوع يحتوي بعض الحساسية فأحب ااكد ان ده للجمع وليس للحصر
والموضوع موجه لجميع المراحل العمرية والأجيال والثقافات ومش في بالي شخص بعينه ولا استثني نفسي

حضرتك راجل كبّارة جبت ابنك للدنيا تعلمه وتصرف عليه وتأكله وتجيبله كل اللي في نفسه وبعدين تختارله الكلية اللي هيدخلها عشان انت اكيد محضرله الوظيفة اللي انت عاوزها ويجي وقت اختيار شريكة الحياة اللي سعادتك هتختارهاله طبعا وبمساعدة الحاجة لأنها لازم تقابل كل احتياجات الحاجة بالحاضر والنعم وبعدين سيادة معاليك يجيلك مرض من الامراض المنتشرة اللي بتيجي بسبب اهمالك لصحتك طول حياتك لأنك كنت ناسي نفسك ومركز في الاهتمام بولي العهد وقياسا على ذلك عدة أمور اخرى وتبدأ بالتقاعد ويبدأ الولد المدلل المطيع برد الجميل فينسى نفسه هو الاخر ويذلل كل مايملك في سبيل رعاية الأب والأم المضحيين إلى ان يتولاهم الرحمن برعايته
ثم يرث كل ماتكبد به الاب في ادخاره ليدخره هو كمان عشان ولي العهد القادم وتستمر ال infinite loop اللي ملهاش interrupts غير المسائل القدرية او الحالات الشاذة الوحشين اللي مش بيعملوا زي الناس ..
وبعدين..؟ مافيش موازنة وبالتالي يتحول الانسان الى آلة لتفعل مايفعله آباؤهم حتى نهاية الدهر بسبب القالب اللي حاطينا نفسنا فيه واللي معمولنا من زمان بس كل جيل له ستايله الخاص بيه بس في العمق هتكتشف ان هو نفسه القالب

هو الكلام في الموضوع ده ميخلصتش وميتلخصش في الكلمتين دول وزي مانتو متعودين (الكاتب بيحب الاختصارات) .. انا طبعا مش جاية اعدل ولا اعترض على حياة اباءنا وأجدادنا و أكيد مش جاية اقولكوا ياجماعة اهلنا غلط وابقى ناكرة الجميل لأني زيي زي اي قاريء معدي اعتبر ضمن المنظومة دي.
انا عاوزة اقولكم ياجماعة ال standards بهدلت المجتمعات والعالم بيتطور ويجي عندنا ميرضاش عشان تمسكنا الشديد العنيف بال standards دي .. احنا بقينا نطبقها لأننا شايفينها منطقية جدا او اكتر حاجة منطقية في العالم عشان اهالينا عملوها اهو وزالفل يابشا :D
مش بقولك كمان شوف ايه اللي في منظومة ال standards اعمل عكسه عشان تتطور .. انا شوفت نماذج حرفيا مش بتفكر ،بتلجأ للمعطيات بتاعت المنظومة وخلاص عشان التعب والارهاق الناتج عنها.
المشكلة انها مش شوية قواعد ونقف عنها دي ليها تطورات لوحدها .. كل ماحد يبتدع حاجة (لاسمح الله) الناس تهاجمه وتتهمه بالزندقة وبعدين بفترة يبدأوا يقلدوه وهوب بقت جزء مهم من الstandards ، زي موضة المدارس الانترناشونال لو حضرتك موديتش ابنك مدرسة منهم هيتهموك بالاهمال وانك رسميا خرجت عن ملتهم وقررت تعلم ابنك بنفسك او تعلمه حاجات من الغرب الكافر .
نرجع لوضوعنا ولأني بعد تفكير توصلت لحل يمكن يطلعنا من الloop دي او عالاقل ممكن نستمر فيها واحنا مدركين لكل مرحلة وكل تصرف مش فعل نسخ والسلام .. مبدأيا حضرتك او حضرتِك في فترة الاوج الفكري والشعوري (مرحلة العشرين) في الكلية او غيره اللي اختارها لكم اباؤكم او العكس معتقدش انها فارقة في الحقيقة مسألة الكلية .. اللي عاوزة اقولهولك ابدأ اقرأ وتثقف في كل شتوت الحياه ،ده أن غالبا ممكن تكون من الناس اللي كانت عايشة للمزاكرة بس طول فترة ماقبل العشرين فا ملقيتش وقت .. لو كنت لقيت وقت وبدأت فعلا فا ابدأ شارك في الأنشطة الحياتية عشان تستوعب المجتمع اللي انت عايش فيه .. لو تقدر تسافر هيبقى افضل لأنه بيوسع المدارك جدا.
once انك تخلص مرحلة من حياتك وتبدأ اللي بعدها وانت بتأسس عقليتك التأسيس الصح هتلاقي نفسك اقوى من انك تمشي على standards ممكن تلاقي نفسك في مرة مشيت على واحدة منها بس هيكون ساعتها بعقل مش بانسياق ..

وأخيرا عزيزي القاري معلش طولت عليك شوية .. اتمنالك السعادة والسلام في حياتك واتمنى نقدر كلنا نتغلب على الstandards اللي محطوطة لكل حاجة في حياتنا
لو عندك اي اضافات او استفسارات حطها في التعليقات .. :))