الفجوة الزمنية هي الوقت المستقطع اللي يفصلك عن الحياة كلها .. تبقى واخد جنب من الدنيا كلها، مش بتعمل اي حاجة في حياتك حرفيا ..
كأنك دخلت غيبوبة وفيه شخص تاني يتملكك .. يعمل حاجات كتير انت مش عارفها ولا عارف تستمتع بيها ... تحارب تقاوم إنك تفوق وتقتله عشان ترجع انت و يرجعلك الكنترول .. تيجيلك لحظات فوقان بتبقى مش عارف تعمل فيها ايه ولا ايه .. تلاقيه شقلبلك حياتك وغيرلك حاجات كتير فا تستسهل وتحاول تتعايش مع الحاجات دي لحد ما يتملكك تاني ويرجع له الكنترول (خلص وقتك)
ويعمل حاجات تانية انت مش عارفها و احيانا يسيبك تتفرج عليه فا تستغرب، هو ده أنا؟ هو ده بيحصل فعلا؟ لما بترجع اول حاجة تعملها انك تتأكد ان ده انت، ده وشك، ده جسمك، دي حاجاتك هي اكيد اتغيرت والكائن ده استهلكها فعلا ..
لسه بتحاول ترجع الحاجات الأساسية زي الاول وتهدى تهدى .. تحاول تمسك الكنترول لأطول فترة ممكنة .. بس اللي غفلت عنه طول الوقت ده انه الفترة دي كلها كان بيقوى و مبقاش سهل تاخد الكنترول زي الأول .. بقى بيتسلى عليك ويديك الكنترول يتفرج هتعمل ايه .. بس يقدر ياخد الكنترول في اي وقت ..
الحقيقة المطلقة التي لا يمكن انكارها ان مفيش حاجة بترجع زي الاول .. لما تقول انا ماسك الكنترول وهرجع أمجاد زمان بيضحك على سذاجتك عشان هو مدرك للحقيقة دي اكتر منك وعارف انك متقدرش ترجع حاجة ... الدنيا بتتغير حواليك وانت مش لاحق تجاريها .. لازم تلحق تعمل حاجة تحط عليها بصمتك أو على الاقل حد يكون معدي ويجيب سيرتك بأي صيغة .. بس هو قافل عليك ومخليك ماشي مسخ ملكش بصمة ولا أثر
تجيلك الفوقة ومتعرفش انت عاوز تعمل ايه ولا ايه .. تزهق تضايق تيأس .. بيضحك اكتر واكتر .. بتستسلم
تجيلك الفوقة ومتعرفش انت عاوز تعمل ايه ولا ايه .. تزهق تضايق تيأس .. بيضحك اكتر واكتر .. بتستسلم
ياخد الكنترول
ترجع للغيبوبة : أنا مين و بعمل ايه هنا ومين الناس دي وليه عاملين كدة وفين ايام زمان ايام الأمجاد اللي مكانش فيه مخلوق يقدر يهد فيها حاجة ..
تفكر .. تحاول .. تعاااافر
تاخد الكنترول وتقول انا انا ومش هتغير و هغير العالم و اهد الجبال
تحاول
فيه حاجات اتغيرت .. الحاجات الأهم مش عارف تغيرها
تعيش معاها .. بيضحك تاني
ياخد منك الكنترول .. كفاية عليك كدة
تتحول لتسلية كائن وهمي .. بس لما بتتكرر كتير ها يزهق ومش ها يسيبلك الكنترول تاني وهتفضل في غيبوبتك الأبدية وهيبقى هو المسيطر الوحيد على حياتك اللي هي بتاعتك، ملكك .. ولما فيه حاجة تصعب عليه وميعرفش يتصرف هيسلم الكنترول لحد تاني .. حد غريب
حد غريب يتحكم في حياتك وانت قاعد في غيبوبتك تتساءل نفس الأسئلة اللي مش بتلاقيلها حل .. تدخل نفسك في infinite loop مبتخلصش ومالهاش مخرج .. موقف كل حاجة لحد ماتخرج من اللوب دي بس اللي متعرفهوش انه عاملك اللوب دي عشان يتفرج عليك كل يوم و يسلي نفسه .. مسلي أكتر من حياتك
المسلي أكتر ان انت اللي حاطط شروط الloop لنفسك وكلهم قالولك بلاش بس أخدك الغرور و قولت دي بسيطة يا جماعة مش هطول فيها
عاوز تفوق؟ مش هتفوق
الloop بدأت خلاص تكرر نفسها كل يوم .. و أي حد يقدر ياخد الكنترول في أي وقت من غير حتى ما تعرف هو مع مين دلوقتي .. يتحكم فيك و يعمل اللي هو عاوزه، واخد كل طاقتك ومجهودك وحبك وأحلامك بيستغلها في الولا حاجة اللي بيعملها وانت لسه تتساءل ..
اكتشفت حاجة اسمها break .. كل ما تبدأ الأفكار دي هيوصل عند break يطلعك من الloop وتاخد انت الكنترول .. مفيش قدامك وقت كبير هتحاول تعمل أي تغيير بسيط بس يكون ليك بصمة .. حاجة تخليك ماسك الكنترول فترة أطول
تبدأ تغير شروط اللوب وتخليها مبتتكررش كتير لحد ما تلاقي حاجة جديدة تعملها ..
برافو
انت كدة بتمسك الكنترول بتضعفه .. واحدة واحدة هترجع
بس خد بالك الغلطة بفورة .. هتضعف و ياخد الكنترول منك تاني ولما تضعف مش هتعرف تقوم و هيحطلك هو شروط الloop عشان مترجعش تاني للأبد
انعم بسلامك يا عزيزي المكافح وقاوم للنهاية
نملة
Comments
Post a Comment