اه بنحب يكون فيه حد عايش معانا وحوالينا ومعاه كتالوج لأدق تفاصيل لينا وبنفرح اوي لما بنلاقيه بيهتم اكتر مننا ولما نقع بيبقى موجود و أوي كمان و أه معظمنا بيقضي طول حياته بيدور على الشخص ده في الناس حواليه ولو محظوظ طبعا هيلاقيه وفيه اللي بيقضي طول عمره بيدور بس مش لاقيه ..
الالتصاق الدائم ده عبارة عن سلاح ذو حدين يعني مش المشكلة انك متلاقيهوش، المشكلة الحقيقية انك تلاقيه ويكون موجود معاك وحواليك وجواك وجوا اي حاجة تخصك ويحشر نفسه جوا يومك زي مابتتمنى وزيادة وده بيدينا احساس الأمان وبيخلينا مطمنين ان فيه حد موجود في كل حاجة حوالينا ,ولكن..
لو اختفى لوقت معين هتلاقي نفسك تايه بدونه .. اه تايه ،ومفيش حاجة في حياتك بتكمل عشانه مش موجود، مجرد تعلقك او ارتباطك بالشخص ده هتبص لنفسك هتلاقي انكو اندمجتوا مع بعض لدرجة ان اهتماماتكو بقت واحدة وشخصيتكو بقت واحدة وفكركوا واحد .. مش حاجة سيئة صح؟
فعلا فكرة الذوبان مش سيئة ولكن السيء فيها انك متقدرش تتعامل في اي مكان من غيره ودايما محتاجاه لانه معاه نصك التاني اللي بتحس انك كامل بيه وانك مظبط حياتك عليه وحاجات في نفسك عليه وخصوصياتك وحاجاتك الشخصية تبدأ تتلاشى وتتحول لمرحلة الانقيادي للكائن ده عشان اتعودت على وجوده في كل حاجة في حياتك .. اللي هو من بعد ماحياته كانت بتتمحور حواليك بقت حياتك انت بتتمحور حواليه جدا لدرجة انك ممكن تكون مستوعب ده بس مش قادر تتخلص من الوضع ده عشان مش عاوز تبعد عنه ومش قادر تستحمله كمان
طيب سعادتك دلوقتي اتلخبطت اللي هو يانملة يعني لو لقيت الشخص ده اندمج معاه واعمل الكوكتيل الفخيم ولا ابعد بسرعة عنه لاحسن افقد حياتي الخاصة بيا ولا ايه بالظبط؟؟
الاجابة انا نفسي بتلخبط فيها لأننا كلنا بشر والانسان داعيييف .. ممكن لو لقيته بعد ما اقعد ساعتين اتكلم معاك واقنعك ان مينفعش تقرب منه هتلاقي نفسك لا إراديا بتتقرب ليه وبتدخله في حياتك بكل رحب وسعادة وبتديله كلللل المارشمللو اللي في حياتك وده مش غلط بس احب انصحك عزيزي القاريء المخلص :D لما تلاقي الشخص ده تقرب منه وسيب نفسك على طبيعتها اللي خلقك ربنا بيها بس احتفظ بشوية مارشمللو في المخزن الخاص بيك .. احتياط
يمكن يجي طوفان ولا زلزال ولا بركان ويدمر كل حاجة وتلاقي نفسك من غير مارشمللو ولا حتى بطاطساية تاكلها :D
وشكرا .. :))
ملحوظة: وانت بتحتفظ بالمارشمللو في المخبأ اللي قولنا عليه اعمل حسابي لزوم الأتعاب .. منا مش بكتب نصائح ببلاش انا مش رضوى الشربيني و لامؤاخذة :D
Comments
Post a Comment