تعريف: هم ناس عندهم مشاعر مختلطة و أفكار مختلطة وسهل تشتيتها وسهل تدخل فيها فكرة جديدة ..
اللطيف فيهم انهم عندهم حس مغامرة عااالي جدا بمعنى عاالي لأبعد الحدود .. ممكن تلاقيهم فكروا في السفر ،في الانتقال، الانعزال، يغيروا حاجات كتير في نفسهم للأسوأ ولا للأحسن ده بيختلف من شخص للتاني .. ممكن تلاقيهم متصالحين اوي مع نفسهم بس ده نادرا جدا ،لكن غالبا بتلاقي فيه ميول suicidical قوية جدا.
ده التعريف المختصر طبقا لجهاز نملة الفني للعلوم والأبحاث ،ولأني طبعا بحب اشارك احدث النتائج والتحليلات العلمية الحصرية مع متابعيني .. ولأني مريت بفترة أشبه بفترتهم واختلط بكتير منهم فا احب احكيلكم عنهم ..
الناس دي غالبا بيكونوا مروا بتجربة سيئة جدا (عاطفية، اسرية، دراسية، ..، الخ) هزتهم وخلتهم يفقدوا الثقة والإيمان بأفكارهم ومعتقداتهم وكمان الناس اللي حواليهم ،خلتهم يعيدوا تفكير في كل حاجة تاني ويدخلوا نفسهم في عدد لانهائي من المتاهات ،ممكن ده بالنسبة لغيرهم عادي بس هي حاجات بتعلم في حياتهم وتخليهم يندفعوا على اي ناس جديدة فيهم صفات مختلفة او ايا كان .. انت ممكن تلاقي حد منهم فيه تناقضات كتير ،بيقول حاجات وتاني يوم يعمل عكسها، مش عارف هو عاوز ايه ولا عارف هو تصنيفه ايه .. عقلهم الباطن بيحاول يخرجهم من حاله الصدمة الشديدة دي بطرق كتير اما الاكتئاب بمراحله او بمحاولة جذب انتباه الآخرين بتغيير شكله او سلوكة وبكدة اللي حواليه هيلاحظوا ده فلو كان من الشخصيات الحساسة - واسمحلي اقول "حساسة" عزيزي القاريء- فا بتلاقيه بيحاول يبان انه متماسك عن طريق انه يحاول يتصرف بطريقة طبيعة وده صعب تعرف هو ايه اللي بيحصله عشان تساعده هتلاقيه بيبذل كل الطاقة اللي باقياله بانه يداري فاحذر عزيزي القاريء .. اما النوع التاني فهو سهل جدا تكتشفة .. بتلاقيه مجد جدا في شغله او لقى حاجة يبعد بيها تماما بحيث انه ينشغل ويقدر يتجاوز الصدمة دي بس للأسف بيكتشف في اخر النهار انه فشل فشل ذريع وينهار.
الناس دي ياجماعة تايهين ومش لاقيين نفسهم .. فقدوا كل الارشادات والدلائل اللي بتوجههم وبتلاقيهم كل يوم بحال ..
وهم حوالينا ومتظاهرين بالعكس فاحاولوا تقفوا جنبهم مهما كانوا بيرهقوكم .. الناس دي مرهقة ومحتاجة حد يحسسهم ان الدنيا لسة بخير وان حد معاهم لحد ما يتجاوزوا الأزمة دي ويرجعوا طبيعيين .. اللي هتستفاده حضرتك ساعتها انك هتكون كسبت امتنان شخص عمره ماهينساهولك
دمتم ..
Comments
Post a Comment