قالك نعيب زماننا ..

مبدأيا كدة اللي مش عاجبه الموضوع او اللي حاسس انه مش هيعجبه او اللي قاعد بيقرا مع صاحبه وصاحبه مش عاجبه الموضع يتفضل كدة بهداوة عشان نشوف شغلنا 

(هذه المدونة تعبر عن رأي الكاتب وغير مسموع ليك بالاعتراض)

فيه عدة مواضيع تدور حواليا اليومين دول وفعليا كل ما اقعد مع حد يكررلي نفس الكلام بالظبط, طب احنا اتكلمنا قبل كدة اننا في أزمة عشريناتية ودي مرحلة وهتعدي .. اقسم بالله مرحلة ,وهتعدي ..
وأشهرها للحصر وليس على سبيل المثال اول واهم حاجة
الدين:
الموضوع بقى معقد جدا وبقيت بسمع آراء غريبة بس غالبا كل اللي حواليا مشغولين بالموضع ده وبيتعمقوا فيه وﻻ هم عندهم اساس عِدِل وﻻ حاولوا حتى يقروا فيه وكل اللي فالحين فيه انهم يفسروا او يقروا المقاﻻت اللي على هواهم وبيتعاملوا مع الموضوع باستهتار وسطحية شديدة وﻻ كأنه دينهم .. لدرجة انهم وفي معظم الاحيان بيخرجوا عن الملة قاصدين و غير قاصدين .. احنا متفقين اننا في لخبطة فكرية بس مش للدرجادي ياخواننا .. وفيه اللي بيحارب من جواه بس خايف يصرح واللي بتلبس حجاب وهي قرفانة منه وهلم جرة ..
مش بقولكم هذا دين آباؤكم بس لو كانوا غلط ايه اللي هيخلينا نستمر؟ هوصحيح ان ربنا خلقلنا عقلنا نفكر بيه وكل حاجة بس فيه شعرة مابين التفكر والمهاجمة .. الكﻻم في الموضوع ده كتير ومربك ومحتاج تكون متشبع كويس عشان لو هتعارض حتى يبقى ليك حجة مش تكون بتعارض ﻷجل الاعتراض

تاني حاجة بقى وهي الشاغل الاكبر أو بمعنى أصح الشاغل الاول للناس اللي مكانتش عاوزة تدخل نفسها في دوامة الدين ..
"الحب يايحيى"
اه طبعا :D .. بيقولك مرحلة العشرينات يصادف انها هي نفسها مرحلة توافق الرؤوس في الحلال (أو الحرام) المهم انها تتوافق في الاخر
بيبدأ العشريناتي من دول يعمل scan في المنطقة حواليه/ـا عشان اخيرا هتسمحله الفرصة انه يعبر عن مشاعره المكبوتة بقالها سنين في الحﻻل ويجي الواحد من دول وأخص بذلك البنات بالذات فجأة نزل عليها الهدوء الروحاني وبطلت اكتئاب وتعمل حاجات تانية يشيب لها الشعر وتصم لها الآذان وبﻻش نتطرق إليها وادينا ارتاحنا منهم الحمد لله
النوعية الأخرى بيبقى نفس الكائن العشريناتي اللي بيعمل scan بس مالقتش ياعيني ودي حالها سئ للغاية بتﻻقيها كل خطوبة او فرح تبدأ تظهر عليها سمات الاكتئاب ولما تعرف ان زميلتها اتخطبت كأن حد من عيلتها اتقتل .. من غير ماتسأل انت عارف الأسباب كلها وغالبا هتآذرها .. برضو واخدين الموضوع بسطحية او ماشيين مع الحاجات اللي المفروض انها تحصل بحكم الجماعة وﻻ ليها اي اساس عقﻻني .. يعني ايه انا راحت عليا وكل صحابي اتخطبوا !! هو مش تقليد هايف ﻻزم تمشي عليه بحذافيره
الموضوع بقى مخيف جدا والناس دي انتشرت .. هتقولي بسب الافﻻم والتليفزيون منه لله الاعﻻم الفاسق .. ﻻ طبعا احنا ناس متعلمين وفاهمين احنا بنعمل ايه وتقريبا يعني عارفين ان الموضوع ليه مقاييس مختلفة
الكﻻم نفسه ينطبق على مشاعر الحب المؤقتة المنتشرة حوالينا بتبقى زي ماتكون رايح مطعم حلو وعجبتك أكلة وكل مرة بتروح تطلبها لحد ماتحس انك شبعت الموضوع بينطبق على الطرفين

عارفين اشمعنا الموضوعين دول اللي شاغلنا دايما رغم انها مواضيع عادية جدا جدا وملهاش انها تاخد الحجم ده كله! عشان ببساطة هي دي المحظورات اللي اتربينا ان عيب وحرام وميصحش وجايين دلوقتي بنعارضها ﻷجل المعارضة .. فيه غيرها من المواضيع اللي غالبا بتبقى على حسب التربية وﻻ أقصد الإساءة وبنحاول برضو تعارضها وخﻻص ..
بالاضافة للكـﻻم بتاع احنا بدل ما نحارب نعمر ونبني وبـﻻ بـﻻ اللي مش مقتنعة بيه وانا بكتبه بس جديا بـﻻش المواضيع دي تاخد مساحة كبيرة من تفكيرك عشان المرحلة اللي جاية هتندم انك قضيت المرحلة الجميلة دي في كﻻم فارغ منفذتهوش وماستغلتهاش في اللي يفيدك المرحلة الجاية

ملحوظة:
الموضوع ﻻ يمت بصلة ﻷي شخص وﻻ يستهدف شخص بعينه بل فئة معينة .. وانا كنت مخططة اني اكتب كلمتين للعظيمة اللي جابتني للدنيا بس سلسلة الأفكار أدت لكل ده للأسف ..