تخاريف عشريناتية

خبايا الروح ومكنوناتها سر من الاسرار اللي بنحاول كلنا نوصل له ونادرين اوي اللي قدروا يوصلوا ,بس مافيش حد وصل وكان محافظ على حياته زي ماهي ,ومهما كنت مفكر انك قدرت تعرف نفسك هتطلع غلطان ولسة مفهمتش هي محتاجة ايه .. احيانا بتبقى محتاج عوامل مساعدة عشان توصل لقمة التصالح مع نفسك والـ Peace inside هي ممكن تتمثلك على هيئة بني ادم ,كتاب ,إشارة او حتى منك انت 
احنا بنيجي عند مرحلة معينة في عمرنا وغالبا هي اللي بتبقى الفاصل بنحاول فيها نثبت شخصيتنا وان احنا كبار زينا زيكم ومحدش يقدر يدينا اوامر زي زمان ..
بس المشكلة اننا في وسط الخيارات الكتير اللي اتفتحتلنا بنتوه جدا واحيانا بنحيد .. ايوة بنحيد عن الطريق الاصلي عشان نقدر نثبت اننا اختلفنا عنهم تماما وصح بمنطق تاني بعدين وانت مكمل هتقول ايه ده ,,ايه اللي انا بعمله ده .. انا هشوف الاصل فين وارجعله وتاخد لفتك اللي لفها اللي قبلك وعطاك خلاصة الخبرات والتجارب وده من حبه فيك وخوفه عليك من التعب وكمان عاوزك تكمل من النقطة اللي وصللها ,بس المشكلة انهم ممكن يكونو هم كمان تاهوا وكملوا على التوهان ده ووصلوك للي انت فيه .. 
انا بكتب الكلام ده وانا زيكو في نفس المرحلة والتوهان عشان كدة انا كمان بناقض نفسي وبحاول اثبت اني صح وخلاص .. مرحلة متعبة بس مهمة جدا ولازم نستغلها بحكمة ونركز عالحاجات اللي بتوصلك للصفاء الروحاني وبكدة هتبقى حاجاتك الدنيوية اسهل بكتير .. هو مثلا فيه كمبيوتر بيشتغل من غير Processor؟ ولا مثلا ينفع تنزل عليه OS من غير مايكون فيه Processor؟ 
اهي دي فايدة الروح ..
فيه حاجات كتير هتوصلك بسهولة من غير ماتتعب وتبدأ من الاول خالص اولها واهمها: اختار المحيط بتاعك ولو لزم انك تغير البلد اللي انت عايش فيها .. ايوة طبعا فارقة كتيير جدا 
مسمعتش عن الراجل اللي ربنا قبل توبته لما راح بلد تانية ومات على حدودها؟
طب مسمعتش عن صاحب السوء؟ ولا جار السوء؟ ولا الصحبة الصالحة؟ ولا عن الزوجة الصالحة؟ ولا ولا ؟؟ بيأثروا جدا جدا جدا في شخصيتك عشان ببساطة انت انسان وروحك بتتأثر بأقل حاجة 
وجود حد في حياتك عمتا بيفرق كتير وبيديك فرصة تغير افكارك ووجهات نظرك ده بالاضافة لهدفه الاساسي وهو الاحتواء والتقدير والاهتمام والوفاء والسماحة والمحبة وهلم جره .. 
المهم تبعد عن "ربطة الروح" اللي تخلي روحك تبقى مربوطة ومخنوقة ومتكتفة بإيد حد وانك تبقى حاسس بالعجز قدامه ومتقدرش كمان تخلع من الربطة دي .. ده غير ان روحك بتبقى مأذية ومش حرة وضعيفة وبتنفر منك ودايما واقفالك عالواحدة :D ,بتبقى محتاجة يا اما اللي رابطها يسيبها يا اما تبقى عندك اللي يحررها او تستعين بحد يقطعلك الحبال اللي رابطة روحك ويساعدها كمان ترجع لطبيعتها وساعتها هتوصل للتصالح النفسي مع روحك .. بنروح بعد كدة لمرحلة ال maintainance:
انك تحاف على روحك وتحبها وتهتم بيها وتعملها اللي هي بتحبه وتبدأ تنتبه للعلامات اللي حواليك ,هيكون لسة عندك خلل بتحاول تربط مابين متطلبات عصرك ومابين الاساس والاصول وهتضطر تتنازل عن شوية حاجات من هنا على شوية من هنا وكلٌ على حسب شخصيته وده هيوصلك للشخص اللي هتبقى عليه في المرحلة اللي بعدها.. 
على اخر المرحلة دي هتلاقي روحك حرة وطليقة ومتزنة وده هينعكس جدا عليك في احتياجاتك الدنيوية عالاقل انت هتكون عارف ازاي ترضي روحك عشان لو اتكررت تاني :D
حافظو على روحكوا وابعدوا عن اي حاجة ممكن تكتفها وروكزوا في العلامات :))