ليه ياجماعة بتربطوا كل حاجة بالظروف او المكان او الاهل او او .. ؟!
ليه لازم يكون فيه شماعة لأخطائكو ومشكلكوا عمتا؟؟ ليه دايما بنحصر نفسنا جوا المنظور الضيق اللي المجتمع بتاعنا وهو بتاعنا بس اللي عايشه .. واللي يخرج عنه يبقى عاوز الحرق والردم والقتل :\
العادات والتقاليد شيء اساسي .. مش هعمل زي العيال الفرافير واقول انا ضدها والكلام الفاضي ده لأن هي دي شخصيتك وكيانك وانتماءك ولو تخليت عنه او تبرأت منه تبقى بلا موطن وبلا كيان ده غير ان باقي المجتمعات مش هتقبلك بالساهل (مش ناقصين بلوة جديدة) ..
بس للاسف وللاسف الشديد كمان احنا عندنا شوية مفاهيم على اعتقادات على شوية تخوفات تدعو الى حفلة تقطيع شرايين جماعية ولا داعي للتعداد دلوقتي انت اكيد جات في بالك كام حاجة دلوقتي واقرا على اساسهم :))
المشكلة مش فيهم عشان لو قولت انا هغير الواقع هتحصلك حاجات وحشة .. المشكلة انهم بيأثروا فيك مش كدة بس دول احيانا بيرغموك تتبع افكارهم العظيمة واحيانا بتلاقي نفسك تلقائي بتتبع كلامهم من غير تفكير عشان متبرمج على كدة .. الحكاية مش حكاية عادات وتقاليد ونسكت عندها دي تخوفات واعتقادات انتقلت من جيل لجيل واكيد اول حد فكر في التخوفات دي كان عنده اسبابه ولما وصلتلنا وصلت لوحدها من غير السبب ده
بقينا على اللي احنا فيه دلوقتي: تايهين, مش عارفين ايه الصح من الغلط, ولا عارفين الصح صح ليه والغلط غلط ليه فيتبقى قدامنا حل من الاتنين :اننا نمشي وراها ونعتبرها حاجات مقدسة زي اللي قبلنا او نتذمر ونثور وننقلب ضدها لحد مانعارض الصح نفسه ونعمل الغلط اللي مبقناش عارفين انه غلط .. الموضوع ده مبقاش ليه مقياس معين بقى لكل واحد ميزانه الخاص
نبعد عن موضوع العادات والتقاليد عشان الموضوع ده مبيخلصش ونرجع لموضوعنا ..
المجتمع والاطااارات..
لأ ثانية واحدة احنا كدة هنرجع لموضوع العادات والتقاليد ده تاني .. طب تصبحوا على خير :))
Comments
Post a Comment