في يوم هادي جدا نملة كانت برة مستمتعة بالجو في عالم الناس خرجت تتمشى لوحدها وسط الناس المستمتعين زيها ,محدش فيهم ليه دعوة بالتاني ولا بيسأله بتفكر في ايه .. كله عايش في ملكوته حتى نملة
وهي في طريقها صادفت نملة زيها كانت بتستمتع بالجو زيها كانت حاسة انها شبهها بطريقة معينة فضلت نملة بصالها كتير ومخدتش بالها انها كانت بصالها بطريقة ملحوظة لدرجة أن النملة التانية تضايقت منها بس ملفتش انتباهها غير انها كانت معاها شباك سحري مصنوع في عالم النمل اللي كانت عايشة فيه .. "ماتوهش عنه" قالتها نملة من جواها وكملت طريقها وهي بتفكر في النملة اللي تشبهها اوي واتمنت لو كان في فرصة انهم يكونوا أصحاب وتعرف الحاجات اللي بتحبها زيها ولا لأ .. بتحب المزيكا زيها؟ بتحب الكتب .. الورق .. السكر .. المارشمللو .. الخ
فضلت نملة تفكر في النملة دي حتى بعد ماروحت واستغربت انها شاغله بالها بنملة عادية جدا مكانش باين عليها اي حاجة مميزة للدرجادي .. انتي وحيدة اوي كدة يا نملة؟!
فتحت نملة الشباك السحري اللي اتغيرت مهمته من ساعة مارجعت عالم الناس اخر مرة وبقت تبص منه على عالم النمل وتعرف اخبارهم على طول وعايشين ازاي ومع انتشار الشبابيك السحرية قدرت تتواصل مع صحابها النمل واهلها المنملين وتعرف اخبارهم
وبكدة كانت حياتها متوازنة بحيث انها مش مفتقدة العالم بتاعها اوي ومش زعلانة من عالم الناس ..
وفي اليوم التالي:
سمعت نملة ان فيه مارشمللو قريب وراحت على طوول عشان تشيل منه للشتا .. هي مبسوطة ان الانسانة اللي عايشة معاها مش بتربي أي كائنات تانية .. دخلت كيس المارشمللو ملقتش غير واحدة بس "دي من نصيبى بقى :D" قالت كدة وهى بتمسك فيها ومروحة بس لاقت اللي بيشد قدامها ........
يتبع ..
Comments
Post a Comment