كل ما تيجي تحلم بحلم جميل ونفسك تعيشه وتبدأ تعيشه تصطدم بالواقع اللي بيضيق دايرة احلامك ويقولك احلم على قدك يابابا .. الواقع اللي بيحجمك زيادة عن اللزوم زي مايكون بيقولك كفاية انك حلمت الحلم مش لازم تحققه ..
كل بلد ليها مدى للحلم وبتحاول على قد ماتقدر انها تساعدك توسعه وبتتغلب معاك على الواقع ده (اساسي)
مرحبا في ام الدنيا :))
هنا بقى الواقع دافع لكل الناس اللي ليهم تأثير عليك حتى البعيد عشان تفقد حلمك .. لحد ما البني آدم الغلبان يبقى كل احلامه انه يعيش وكل اللي شاغله المأكل والمشرب والمسكن فبيتحول لآلة مالهاش حلم ,مش بتفكر ومالهاش اي رغبات غير انها تشبع جوعها اولا .. طب سؤال ،،هو مش كدة خلاص؟؟ لا مش خلاص :@
مثال عليا كنملة فرفورة
اني لما كنت صغيرة كنت مبهورة بكونان والمسلسلات البوليسية وقولت لماما انا عاوزة ابقى محققة زيهم وبكل براءة .. قالتلي مينفعش دي مش بتأكل عيش في بلدنا الكلمة دي خرستني وقالتلي خليكي دكتورة احسن عشان نفرح بيكي
بس انا مش بحب المهنة دي يا ماما :(
المهم دخلت الثانوي زي اي طالب غلبان كل حلمه كلية الطب بكل فروعها وخليت دكتور مجدي يعقوب قدوتي وهعمل زيه وابقى مشهورة لحد ما اقنعوني اني لو اتخرجت على رجلي هبقى سوبر هيرو
وطبعا المفاجأة اني مجبتهاش وخسرت الحلم الفظيع اللي اصلا مش بتاعي واخترت اكمل في هندسة واتحجمت جامد لحد ماجبت كليتي الرائعة جدا جدا .. السؤال بقى: هي دي الحاجة اللي عاوزة ابقى عليها فعلا؟ هي دي الحاجة اللي بتبسطتني؟ طيب هو انا عاوز ايه؟؟ كلها ارزاق بس لو الافق كان واسع قدامي كنت هختار الحاجة اللي بحبها وربنا هيسهلي فيها .. ماعلينا
قصة قصيرة حزينة .. بس اللي ببينه هنا هو ان هي دي ارض الاحلام ولو عايز تبقى حاجة يبقى المفروض تكون مجنون او اهبل عشان تطلع برة الساقية عادي يعني ده الواقع ياجماعة
بس ياريت محدش ييأس لو نفسك في حاجة اعملها .. الحياة اقصر بكتير من انك تضيعها عالفاضي :))
Comments
Post a Comment