كان ياما كان ..كان فيه زمااان "نملة" ,النملة دي كانت عايشة في عالم عملاق جدا عليها (هو فعلا العالم عملاق على نملة زيها) :D
النملة دي كانت عايشة في حالها وعايشة حياة هادية ومستقرة كانت بتروح المدرسة وتيجي من المدرسة وكان عندها شباك سحري كان كل اللي يبص منه يتسحر ,,كان الشباك ده بتبص منه كل حين على العالم الخارجي ..كانت شايفاه جميل ومزهزه كانت نفسها تعيش فيه اوي .. شوية بشوية لقيت الشباك ده بيشدها اكتر واكتر ,,كان من كتر ما العالم ده حلو وجذاب كانت بتحلم تروحه اوي ولما قالت لباباها ومامتها قالولها لازم تزاكري كويس عشان تروحي العالم الخارجي وانتي قوية ومسنودة بعلمك ومعرفتك ,, المهم "نملة" زاكرت وزاكرت وزاكرت وتعبت نفسها جامد وبقى العالم الخارجي ده حلمها الوحيد, كانت بتجهز كل حاجة في حياتها ليه .. جابت هدوم جديدة ومزهزهة عشان تلبسها هناك فقط وقعدت تبص من الشباك السحري عشان تقلد "الناس" اللي هناك ...
 |
| نملة وهي بتتفرج على العالم الخارجي من الشباك السحري |
مامتها كانت بتحكيلها زكرياتها زمان لما كانت في العالم الخارجي وانها كانت في يوم برضه نملة زيها وانها طلعت للعالم الخارجي زيها وحكيتلها عن مغامراتها فيه.
"نمله" كانت متحمسة جدا للعالم ده .. كانت مجرد ماتفكر في العالم ده بتبقى مبسوطة وتنسى كل زعلها,, وفي يوم باباها قالها: قومي يا نملة عشان تجهزي نفسك للسفر. نملة استغربت: اسافر فين يا بابابا. قال الأب: هتسافري العالم الخارجي اللي نفسك تروحيه, كلمتلك شوية نمل رايحين وهياخدوكي معاهم تعيشي على السكر من صنع الناس وبيتك هيكون شق في جدار ،استغربت نملة ايه هو الجدار ده وياترى الناس كمان بيعيشوا في جدار؟ ولكنها كانت سعيدة من سعادتها انشغلت بتوضيب اغراضها ونست أن تودع أصدقائها في عالم النمل وانطلقت مع أول طلعة للشمس ، وقبل ان تنطلق لرحلتها لقنتها النملة الأم الوصايا العشرة اللي لا يمكن أن تنساها و وعدتها انها تنفذها وأعطتها بعض المارشمللو وقالت : "هذه أمانة يا نملة ولازم تخلي بالك من الامانة دية، يمكنك أن تأكليها لما تحتاجي ومتلاقيش حاجة تاكليها" .
يتبـــــــع...
Comments
Post a Comment