السطحية ..
بفكر في الموضوع ده بقالي يومين بالظبط .. ان الموضوع مش مرتبط بسن ولا بمكان و لا بال career، هي حاجة بتطلع في الإنسان كدة زي المرض المزمن الذي يصاحبه طوال فترات حياته ..
ولما جيت احلل الموضوع بمهاراتي الفذة جدا وصلت ان المشكلة في الشخص ده من سن سنتين ايام ماكان بيشبط في حاجة وأهله يستخسروها فيه فا يكبر ويلاقي زمايله كلهم معاهم الحاجة دي و يعايروه انه ماجابهاش (ايوه يا سادة من وجهة نظره انها معايرة و إهانة كبيرة كمان) فيكبر و تكبر العقدة وكل مرحلة تتعقد اكتر من اللي قبلها لحد مايفضل دايما حاسس انه اقل من اللي حواليه ويحاول يبقى احسن منهم كلوووووهم .. فيعمل لود على نفسه عشان ينتصر عليهم كلهم وعلى كل اللي اتسبب له في العقدة دي .. الشخص ده قدامه حاجة من الاتنين : إما يخسر وكدة هيعيش طول عمره كاره دنيته ومتشائم وقافل على نفسه ، أو ينجح ودي افظع :D
عارف مثل احذر المش عارف ايه اذا تجبر!! ده ينطبق عليه تماماً ..
بيبقى وصل وبقى احسن من كتير في دايرته وطبعا فيه الاحسن دايما بس كدة راضينا نفسنا عالاقل :D
بيبدأ يفرح بانجازه وينشره في كل مكان و يذل اللي اتسببوا زمان في العقدة بتاعته ويبقى لئيم جدا في تصرفاته .. مش مهم اللي تسببوا في عقدته عشان يستاهلوا بصراحة .. احنا بقى ايه ذنبنا؟ها؟
يجي الكائن ده يطلع عقدته علينا بتصنيفه الناس بطبقية ظالمة ويحسب نفسه مع الطبقة الأحسن وبكدة يبقى انتصر على شخص جديد ويمسك العيوب السطحية اللي مش بتأثر في جوهر المعاملات الآدمية ويبني بها حصنه الواقي ويرميك من براه ..
شكلك ،كلامك ،المزيكا بتاعتك، وطبعا احلامك وطموحاتك ودي آكتر حاجة بيركز عليها لأنها كانت مأساة حياته في فترة من الفترات، حظك يبقى وحش جدا لو كنت اقل منه في حاجة من الحاجات دي لأنه مش هيرحمك ومش هيسكت .. أبداً
من ناحية تانية .. الشخص ده غالبا يطمح للناس اللي معاييرها السطحية ممتازة .. ده بالنسباله الكمال .. شخص كامل زيه ميعرفش غير ناس كاملة زيه .. شكلها حلو اكتر من اللي روحهم حلوة (يكمل عقدته) .. انا مش بشتم لاسمح الله
بس الموضوع زاد عن حده الصراحة و كدة خطر علينا كلنا .. الكائن من دول منتشرين في وطننا العظيم وفي أوطان كتير .. هروبك منه مش حل لأن بكل بساطة هتلاقي أمثاله كتير في كل حتة ..
كالعادة هقولكم الحلول العظيمة بتاعتي:
الحل الأول: نعمل حملة نناشد الحكومة تاخد قرار حاسم بشأن الموضوع ده ويقتلوا الكائنات دي اول ماتتولد عشان صعب نقتل لسعادتهم الابهات والامهات والاخوات والجيران والصحاب والزمايل ..
الحل التاني: طبعا عشان الحل الأول مش هيتنفذ ،، تقتله أول ما تقابله .. مش حرام انت كدة بتنقذ البشرية وهتتكرم على الفعل النبيل ده .. خليك جاهز و أول ما تقابل الكائن ده اقتله ..
دمتم ..
Comments
Post a Comment